MENU

Tinapyas na P5 B budget ng TESDA ibabalik: Lapeña nagpasalamat sa Senado


December 26, 2018

Pinasalamatan ni Technical Education and Skills Development Authority (TESDA) Director General, Secretary Isidro S. Lapeña, ang Senado sa pagtitiyak na ibabalik ang tinapyas na P5 bilyon pondo ng ahensiya para sa susunod na taon.

Inihayag ni Lapeña ang kanyang pasasalamat sa harap ng mga empleyado ng ahensya sa ginanap na flag raising ceremony noong nakaraang Lunes, Dec. 17.

Sa kanyang ulat sa mga empleyado ng TESDA, sinabi ni Lapeña na noong dumalo siya sa ginanap na budget hearing ng ahensiya sa Senado noong Disyembre 6, ipinabatid sa kanya ng mga senador na tinapyasan ng P5 bilyon o P4.86 bilyon ang eksaktong halaga, ang 2019 budget ng ahensiya. Idinahilan nila ang umano’y mababang antas ng paggasta sa pondo ng ahensiya noong 2018.

Inamin ng TESDA chief na hindi niya nakausap sina Senators Loren Legarda at Sonny Angara bago nagsimula ang hearing, subalit nakausap naman nito si Angara noong huli.

Nakiusap umano siya sa ibang senador sa katauhan nina Senators Panfilo Lacson, Richard Gordon, Joel Villanueva, dating TESDA Director General, at maging kay Angara na ibalik ang tinapyas na pondo ng TESDA.

“I explained it to them, to Senators Lacson, Gordon and Villanueva. Of course, iyan ang ating palaging katulong, si Villanueva being former DG of TESDA, and of course to Sen. Angara. I was able to meet them and they committed to restore the full amount back to TESDA, P5 billion maibabalik nang buo,” ani Lapeña.

Ipinaliwanag umano ni Lapeña na atrasado ang pagpapalabas ng pondo ng ahensiya kung kaya mabagal din ang paggasta at ang naapektuhan nito ay ang bilang ng mga kliente na mabibigyan ng skills training.

Ani Lapeña, sa nakalipas na tatlong taon, sa kabuuang 45 milyon clientele na target na maserbisyuhan ng ahensiya, 2.7 % o 0.58% bawat taon o mababa sa 1% lang ang nabigyan ng serbisyo.

Nang ipaliwanag umano ni Lapeña kay Lacson ang mga kadahilanan, sinabi ng senador na ang kondisyon ng TESDA ay “pathetic”.

“Iyon ang word n’ya, kaawaawa,” ani Lapeña. Nauna rito, ipinaliwanag ni Lacson ang kanyang posisyon sa pagsuporta na ibalik ang binawas na pondo ng TESDA.

“In 2018 they received the budget from the Commission on Higher Education in September. So there was little time to obligate. That is the reason why they have a very low obligation rate in 2018, only 58 percent,” paliwanag ni Lacson.

Magkakaroon umano ng sapat na pagkakataon ang TESDA para magamit ang pondo nito sa kasalukuyang taon kung lumabas sa tamang panahon ang pondo nito.

Tiniyak ng TESDA na lulutasin ang nasabing problema dahil ang apektado rito ay ang mga mamayang Filipino kaya mahalaga na maibalik ang binawas na pondo.

Kamakailan, sinabi ni Senator Franklin Drilon na sisikapin nilang matapos ang budget deliberation para sa 2019 budget sa January 27.




Back to List