MENU

Free TVET may 9,000+ enrollees – Lapeña


January 27, 2019

Umabot na sa 9,497 ang enrollees para sa free technical vocational education and training (TVET) sa ilalim ng Universal Access to Quality Tertiary Education Act (UAQTEA) sa inisyal na pagpapatupad nito ng Technical Education and Skills Development Authority (TESDA).

Ayon kay TESDA Director General, Secretary Isidro S. Lapeña, ang nasabing bilang ng mga enrollees para sa UAQTEA-Free TVET ay kasama sa kabuuang 51,325 na nagpalista para mag-avail ng nasabing programa mula Oktubre hanggang Disyembre 2018.

Ang 9,497 scholars na nagsimula nang mag-training noong Oktubre 1, 2018 ay naka-enroll sa 212 implementers o iskwelahan, mula sa kabuuang 317 mga State Universities and Colleges (SUCs), Local Universities and Colleges (LUCs), LGU-run training centers at TESDA Technology Institutions (TTIs) na magpapatupad nito sa buong bansa.

“Enrollees to Free TVET shall have the benefits covering the tuition, miscellaneous fees, and trainee support provisions (national competency assessment, instructional materials, living allowance, starter toolkit and workshop T-shirts),” paliwanag ni Lapeña.

Batay sa paunang plano, nagnanais ang ahensiya na maka-produce ng 170,000 beneficiaries sa unang batch ng UAQTEA-Free TVET na nilaanan ng Php 6.9 bilyon para sa academic year 2018-2019.

Ang Republic Act No. 10931 o kilala rin bilang UAQTEA, ay naglalayon na pagkalooban ng libreng tuition at iba pang school fees sa mga SUCs, LUCs, LGU-run training centers at TTIs, pagtatag ng Tertiary Education Subsidy and Student Loan Program (SLP). Layon din nito na patatagin ang Unified Student Financial Assistance System for Tertiary Education (UniFAST), at paglalaan ng pondo para dito.

Ang UAQTEA ay magbibigay ng pagkakataon sa lahat ng Pilipino mula sa lahat ng antas ng pamumuhay na maka avail ng tertiary education at mabigyan ng pantay na oportunidad ang lahat sa quality tertiary education mula sa pribado at public education institutions. Bibigyan ng prayoridad nito ang mga mag-aaral na mga technically-able at mga mula sa mahihirap na pamilya.

Ang nasabing batas ay nilagdaan ni Pangulong Rodrigo Duterte noong April 3, 2017 na epektibong ipapatupad sa academic year 2018-2019.

Hinikayat ni Lapeña na maari magtungo ang mga interesado sa pinakamalapit na TESDA Provincial Office o bisitahin ang TESDA website (www.tesda.gov.ph).




Back to List